Банките нема да им наплаќаат на социјалните случаи за деблокирање на сметките поради неплатени долгови. На вчерашната средба на банкарската асоцијација со министерот Тевдовски и министерката Дескоска, банките се согласиле да не наплаќаат надомест доколку се блокира сметка на човек кој е социјален случај, прима алиментација, хуманитарна помош или друг вид заштитен приход.

И тие се свесни дека она што банките го наплаќаат како 2.500 денари за деблокирање на сметка на примател на социјална помош, студентска стипендија, е недозволиво да го плаќа, тоа е голема сума, а за банките исклучувањето на овој надомест не е никаков финансиски проблем. Остануваме на законските одредби и имаме согласност од банките, рече министерката Дескоска.

Според предложениот закон, за долговите до 1.000 евра трошокот за деблокирање од 20 евра ќе се намали на 2 евра а за поголемите долгови ќе се плаќа најмногу 6 евра.

Ќе има промени и кај луѓето со минимална плата и кај нив ќе има намалување, бидејќи има побарувања од 90-тите години за кои извршителите не се криви, изјави Зоран Димов од Комората на извршители.

Законот за извршување кој е во собраниска процедура, предвидува намалување на тарифите за 60-90%. Комората на извршители не се согласува со предлогот. Велат дека во преговорите што следат на владата ќе и ги дадат своите пресметки.

Нашите анализи велат дека тоа е преголемо намалување и ќе е предмет на преговори. Ќе се најде решение и ќе се заштитат интересите на граѓаните. Приходите и предметите се драстично опаднати, додава Димов.